Bélgica Dagua,  "Runa Kushillu Tukun"

 

Kushilluta runa chari aj ashka ñaupa.  Warmiyuj ashka. Warmiyuj aka.  Niska payba karitaga.  Kunan kasna pay chagrata rangawa nisha kuintanakushkauna pay kari.  Chiga nishka, "Asuangui ñuka waykiguna ashka manun.  Paygunallatami yanapay tukushun," nishashi rimashka.  Chiga chasna nisha nipiga payga warmiga asuaj askay.  Tinajagunay ashkata asuasha, "ñuka kari imashinay shamunga? nijpi.  "Puringajmi riuni.  Wayra shinami ñukaga vulltianga riuni," nij ashka paywa warmita. "Mingayta rangaj ñuka waukiguna ashka shamungaraunguna," nishka.  Chiga payga chi tinajagunata ashkata asuashaga warmiga sumak ña llapisha tutamanda paywa waukiguna shamungaraunguna nisha.  Mukajagunataga ña sumakshi churaj aj ashka muntunasha ña chimanda pay apisha upichingaj.  Chiga rikujpi manashi rikurij chashka.   Mana rikurin.  Mana rikurin.  Rikujpi, tutamanda pagarishkay rikujpi iIllan chi asuara pagarij ashka.  Pay asuashka asua ña illaj warmi.  Chiga pay warmiga nigan, "Maymi chiga tutamandashi shamunga?”  "Mana," nisha nij ashka. "Ñuka wauki sakichisha kayllay pariulla tandarisha upingawa nisha, nijpimi ñukaga sakirisha chimalla aurani," nisha ya.  Tutamanda shinashaga, "Kunan rimajringui marai kan waukigunataga upingawa  kaybi," nishashi rimaj ashka pay warmi.  Chiga rimajpiga umaj ashka.  Chiga chasna, "Shinasha rimangajmi riuni ñuka waukita," nishaga payga rij ashka chi kushilluga pay runa ashkay.  Rij.  Chiga rikujpi asua mangama rikujpicha illan!  Chi tutaga upishka. Mana tiashka.  Kasna win asua tukurishkaychu pi upin, runaga mana tiaj ashkauna.  Chiga mana tiajpi pay amuga nij ashkay, "Pita upinga kaybi?”  "Ñuka kari raygumi asuarani. Ñukaga mana shukguna upingawa raukanichu!" piñarij ashka pay warmi.  "Kunanga tutami chapangaruani," nishka chi warmi.  "Kunan yangas rikungarauni imas kayta kasna upin," nisha.  Chi asua mangata sumakta llapisha karan tinajata llapisha ña rikushka washa.  Shimima kasna alli, alli, rasha kamajpiga, "Kayga alli machana man ñuka mashagunata!" machachishami nishashi chi warmiga rimashaga.  Payga ña sumak allichisha chapaushka, chapaushka.  Chapau, chapau, puñushka.  Chiga doce tutaybi rikujpi shamushkauna kushillu, chimanda machin, sipuru, chimanda mashti, ña tukuy kay sachamanda aj.  Chayguna ña win runa muyulla ashkauna payguna.  Chiga chimi payba waukigunaga nij ashka.  Chiga chi tandarimusha paygunaga tuta upij ashkauna, llandu ukuy tiarisha ña tutaga.  Ña upiushkauna.  Chayga ña chiga upin, "Upin  wauki!" ñishka. "Kambas amas wauki!"   Apijga, Tas! shu upin. Mukajataga apasha chi, mukajata kasnama churasha karanma mukaja, mukaja, mukaja churashkauna. Tuta ansay ña, ansay tiaun upisha, "Mana asinguichichu wauki. Puñuuj musiangami!" nisha. Rimaun puñuj pay warmi musiasha. Musiasha rimay tukushun. Chiga payguna, chi chasna tandarisha win!  Chi barisa, chiga barisashi nira  "Ñukata mana upichiwangunachu, tsukrut! tsukrut!" asisha tian.” Chunlla tiay!  Kanmanda musiay tukungaruan.  Chiga pay warmiga mitikusha kasna esquinamanda shayariasha rikuun. Kayga kasna rashami ñukata taraban asua nisha kasna upij aj ashkauna. Chiga wituktaga shikishaga kunanmi ñukata rabiachiwan nishaga. Kay kasnami kandaga shukgunataga kuintashaga chasna tandarisha upishami mana yanapawan. Kunan karitaga kuintashaga pingachichingarauni nisha, kaybi taj apashaga rishka.  Chiga upichiushkashi, "Upingui wauki!" nishashi pay upichiushka.  Chaytaga apijga kay witukwanga ba! shi ñaybitaga kakushkaga sumak.  Kakujpiga ña shinki ñaybi tukushka payba ñabi.   Chibiga ay kunanga musiawanguimi.  Kunanga mana kanwanga kausashachu, kunanga riunimi ñuka.  Waukiguna kaygamalla mashka ñuka kangunawan kausanaga kunanga riunimi.  Ñukata mara ña kushka "chuti!"  saltasha ruyama tiapin, tiapin, tiapin  awatacha rishka.  Kunanga ñuka mikuna ruyaga tukuy kay sachaybi tiajmi tian ñuka mana kanda asuata tapushkanguichu. Aa! nishka shi pay, chasna piñarisha rira. Chimanda kay kushilluga runamanda pay tukuj ashka.  Chi raygu kay runa imatas kay tuta upinga asuata rinaun china.  Kallary timpu kushillu tuta asuata upingawa nisha rimaj anaun kunan uraspiwas.  Kushilluga payga tutallacha asuataga upij aj ashka, paywa warmi asuata.  Ña chaupi tutay, chiwas chi cha ña warmis allipacha puñuskaybi chasna upiun ña.

Chiga pay win waukigunawa tandarisha upijga ña win kay sacha animal makiwan purijshi tandarij aj ashkauna.  Upingawaga. chasna.